Taka Amaroq af markaði í Kanada

Í tilkynningu þess efnis til Kauphallar segir að hlutabréf félagsins, í formi hlutdeildarskírteina sem gefin eru út af Computershare Investor Services PLC í Bretlandi, muni áfram vera skráð og í viðskiptum á AIM, Nasdaq Iceland og OTCQX.

Lítil velta

Frá því að hlutabréf Amaroq hafi verið tekin til viðskipta á AIM og Nasdaq Iceland hafi dagleg velta með hlutabréf félagsins í Kanada verið tiltölulega lág miðað við heildarveltu á öllum mörkuðum. Í ljósi þessarar lágu veltu telji félagið að sá kostnaður og þær kvaðir sem fylgja því að viðhalda skráningu á TSX-V réttlæti ekki áframhaldandi skráningu í Kanada.

Samþykki hluthafa vegna afskráningarinnar sé ekki áskilið þar sem hlutabréf félagsins verði áfram skráð á AIM og Nasdaq Iceland, sem teljist fullnægjandi markaðir samkvæmt reglum TSXV.

Af vaxtarmarkaði á aðalmarkað

Eins og áður hafi verið greint frá hafi félagið haft til skoðunar að færa skráningu sína í London af AIM yfir á Aðalmarkað Kauphallarinnar í London (e. LSE Main Market) og jafnframt skrá hlutabréfin á opinberan lista Breska fjármálaeftirlitsins með það að markmiði að breikka og styrkja fjárfestahóp félagsins enn frekar.

„Með vaxandi umfangi og stærð starfsemi Amaroq er orðið ljóst að til þess að fá aðgang að frekari stuðningi stofnanafjárfesta og vísitölusjóða er aðalmarkaður LSE, samhliða Nasdaq Iceland, heppilegasti vettvangurinn til að styðja við áframhaldandi vöxt félagsins. Amaroq staðfestir að félagið hyggst ljúka þessum flutningi á árinu 2026 og hefur skipað Citigroup Global Markets Limited sem umsjónaraðila og ráðgjafa.“