Mosfellingar enduðu taphrinuna og Haukakonur unnu fyrir norðan

Stjörnumenn voru búnir að tapa sjö deildarleikjum í röð þegar þeir heimsóttu Aftureldingu og þeir voru tveimur mörkum yfir á lokakafla leiksins og sáu langþráðan sigur í hillingum. Þá komu fjögur mörk í röð hjá Mosfellingum sem unnu að lokum eins marks sigur, 29-28.

Þetta var fyrsti sigur Aftureldingar eftir að deildin fór af stað á ný eftir EM- og jólafrí.

Stjörnumenn byrjuðu leikinn vel og voru lengi með tveggja marka forystu í fyrri hálfleiknum en í stöðunni 14-12, skoruðu Mosfellingar þrjú mörk í röð og tóku frumkvæðið. Afturelding var síðan einu marki yfir í hálfleik, 16-15.

Stjarnan var síðan aftur komin með tveggja marka forskot í seinni hálfleik þegar heimsmenn fóru í gang og redduðu sér.

Harri Halldórsson, Ihor Kopyshynskyi, Ævar Smári Gunnarsson og Oscar Sven Leithoff Lykke skoruðu allir fimm mörk fyrir Aftureldingu en Hans Jörgen Ólafsson var markahæstur hjá Stjörnunni með tíu mörk en Benedikt Marinó Herdísarson bætti við sjö mörkum og sex stoðsendingum.

Haukakonur gerðu góða ferð norður til Akureyrar og unnu ellefu marka sigur á heimakonum í KA/Þór, 31-20.

Haukaliðið náði mest sex marka forskoti í fyrri hálfleik en munurinn var aðeins tvö mörk í hálfleik, 15-13, fyrir Hauka. Í seinni hálfleik sigu gestirnir aftur fram úr og unnu mjög öruggan sigur.

Jóhanna Margrét Sigurðardóttir var öflug hjá Haukum með níu mörk og þrjár stoðsendingar en þær Inga Dís Jóhannsdóttir og Rakel Oddný Guðmundsdóttir skoruðu fimm mörk hvor. Susanne Denise Pettersen var markahæst hjá KA/Þór með fimm mörk.

Haukaliðið er í þriðja sæti með 21 stig og sex stigum meira en KA/Þór sem er í sjötta sætinu.