Á að fá endur­greidd gler eftir gallaða sjónmælingu

Konan kvartaði undan óþægindum innan við viku eftir að hún fékk gleraugun afhent í febrúar í fyrra. Sjónin með gleraugunum hefði verið eins og hún væri ölvuð og hún hefði fundið fyrir verkjum þegar hún notaði þau lengi í senn.

Verslunin gaf þær skýringar að óþægindin væru eðlileg vegna þess hve glerin í umgjörðinni, sem var nokkuð stærri en í eldri gleraugum konunnar, væru þynnt. Það tæki tíma að venjast glerjunum.

Konunni var meðal annars boðin ný sjónmæling, sem skilaði svipuðum niðurstöðum og sú fyrri, daufari gler og afslátt af nýjum glerjum. Hún lagði aftur á móti fram niðurstöður annarrar sjónmælingar sem

Áður en málið var til lykta leitt hætti verslunin rekstri. Af þeim sökum sögðust forsvarsmenn þess hvorki geta útbúið ný gleraugu fyrir konuna né endurgreitt henni.

Gölluð frá upphafi

Kvörtun konunnar til kærunefndar vöru- og þjónustukaupa byggði á því að verslunin hefði gert mistök við sjónmælinguna og að styrkjur glerjanna hefði fyrir vikið verið of hár. Krafðist hún þess að fá annað hvort ný gler eða að verslunin endurgreiddi henni hundrað þúsund krónur sem hún greiddi fyrir glerin. 

Verslunin hafnaði því og sagði meðal annars að ekki hefði verið óeðlilegur munur á sjónmælingum á konunni.

Konan lagði fram nýja sjónmælingu en niðurstöður hennar voru að glerin sem hún keypti af versluninni væru frekar sterk. Kærunefndin benti á að umtalsverður munur hefði verið á niðurstöðum þeirrar mælingar og þeirrar sem verslunin sem seldi konunni gleraugun gerði.

Kærunefndin komst að þeirri niðurstöðu að forsvarsmenn verslunarinnar hefði ekki sýnt fram á að glerin sem byggðu á sjónmælingu þeirra hefðu ekki verið gölluð við afhendingu. Gallinn gerði gleraugun ónothæf fyrir konuna.

Niðurstaðan var því að verslunin ætti að endurgreiða konunni hundrað þúsund krónur fyrir glerin gegn því að hún skilaði þeim.