Fór á skeljarnar og vann svo Ólympíugull

Það var vel við hæfi að parið skyldi trúlofast á Ólympíuleikunum því samband þeirra hófst einmitt á Vetrarólympíuleikunum í Peking fyrir fjórum árum. Fyrstu stefnumótin voru þær því með grímu fyrir vitunum og plastgler á milli sín, á Covid-tímum, en þær gátu svo sannarlega séð bros hvorrar annarrar í Mílanó í síðustu viku.

„Ólympíuleikar færðu okkur saman. Þessir leikar gera það að eilífu,“ skrifaði Knight með myndbandi af trúlofuninni á Instagram.

Báðar eru þær stjörnur í sinni íþróttagrein. Knight hefur farið á fimm Ólympíuleika og á í sínu safni flesta heimsmeistaratitla eða tíu talsins. Bowe hefur að sama skapi unnið 91 verðlaun á heimsbikarmótum í skautahlaupi, sex HM-gull, sett fjögur heimsmet og tvívegis unnið til bronsverðlauna á Ólympíuleikum.

Leikarnir í Mílanó voru í fullum gangi hjá þeim Knight og Bowe þegar sú fyrrnefndar ákvað að láta verða af því að biðja sinnar heittelskuðu, síðasta miðvikudag. Hún plataði Bowe til að koma út fyrir Ólympíuþorpið að hitta systur sína sem var að sjálfsögðu með í ráðabrugginu.

Systirin bað svo parið um að stilla sér upp og sagðist vilja ná mynd af þeim með fallegan bakgrunn, og þá var komið að stóru stundinni.

„Ég og systir mín erum alltaf að taka myndir,“ sagði Bowe. „Svo við Hilary vorum að stilla okkur upp en þá skipti hún um stellingu, tók hringinn upp úr jakkavasanum, fór á hnéð og bað mig um að giftast sér. Þetta var svo sætt og einfalt, og nákvæmlega það sem ég hefði óskað mér,“ sagði Bowe.

Eins og fyrr segir spilaði Knight svo úrslitaleik með Bandaríkjunum gegn Kanada eftir trúlofunina, og fagnaði þar Ólympíugulli í háspennuleik. Bowe rétt missti hins vegar af verðlaunum í 1.500 metra hlaupi á föstudaginn, þegar hún endaði í 4. sæti.