„Vona bara að lands­liðsþjálfarinn hafi verið að horfa“

Borche Ili­evski, þjálfari ÍR-inga, var kampakátur í leikslok og frammistöðu sinna manna þegar á reyndi.

„Heilt yfir var þetta frábær leikur sem hefði getað farið á hvorn veginn sem er. KR-ingar spiluðu mjög vel en á ögurstundu í fjórða leikhluta vorum við fullir af sjálfstrausti og lögðum allt í að vinna þennan leik. Þetta var bæði krefjandi og mikilvægur leikur fyrir okkur. Við vildum vinna hann til að fylla okkur af sjálfstrausti fyrir úrslitakeppnina.“

Hákon Örn Hjálmarsson var frábær í liði ÍR í kvöld og hitti úr níu af tíu þristum. Það er tölfræði sem maður sér ekki á hverjum degi, og Borche kallar eftir því að Hákon komist í landsliðið.

„Ég er ekki búinn að skoða tölfræðina en ég trúi þér! Hákon skaut ótrúlega í kvöld. Hann er í frábæru í formi og er hefur verið leiðtogi liðsins í allan vetur. Ég „vona bara að landsliðsþjálfarinn hafi verið að fylgjast með“ þessum leik því ég er sannfærður um að Hákon geti hjálpað landsliðinu í sumar ef hann fær kallið. Hann var leiðtogi liðsins á vellinum í kvöld og dró það áfram þegar á reyndi. Að sama skapi þá stigu eiginlega allir upp í kvöld. Eiginlega allir áttu sín augnablik þegar við þurftum á því að halda.“

ÍR-ingar voru þegar búnir að tryggja sér sæti í úrslitakeppninni fyrir leikinn en Borche sagði að sigur á jafn sterku liði og KR ætti að gefa liðinu sjálfstraust fyrir komandi leiki í úrslitakeppninni.

„Engin spurning. Við erum að reyna að fylla okkur af sjálfstrausti fyrir úrslitakeppnina. Við vitum væntanlega ekki fyrr en eftir lokaumferðina hverjum við mætum en það verður væntanlega lið úr topp þremur og við viljum mæta í þá viðureign fullir af sjálfstrausti.“ 

„Að mínu mati er KR eitt besta liðið í deildinni, og sennilega með besta byrjunarliðið. Að mínir menn hafi lagt þá af velli í kvöld segir mér að við getum keppt við hvern sem er.“