Bergrós endaði númer sau­tján í heiminum: „Þýðir mikið fyrir mig“

Bergrós var meðal efstu kvenna allar vikurnar og endaði í sautjánda sæti.

Hún varð fimmta í fyrstu viku, í 34. sæti í annarri viku og loks í 97. sæti í þriðju viku. Bergrós kláraði því meðal hundrað bestu í öllum vikunum þremur en aðeins slakari þriðja vika þýddi að hún lækkaði um ellefu sæti. Árangurinn er engu að síður stórglæsilegur og boðar gott fyrir komandi tímabil.

Bergrós er ekki bara sautjánda í heiminum heldur einnig tólfta meðal evrópsku stelpnanna. Þetta er líka þriðja árið sem Bergrós tekur mikið stökk á listanum. Hún hækkar sig um sextán sæti frá því í fyrra, þegar hún endaði í 33. sæti, og árið þar á undan var hún í 160. sæti.

Næstar af íslensku stelpunum voru Steinunn Anna Svansdóttir (172. sæti), Guðbjörg Valdimarsdóttir (195. sæti) og Elín Birna Hallgrímsdóttir (225. sæti).

Efsti íslenski karlinn var Bjarni Leifs Kjartansson sem náði 29. sæti en Rökkvi Hrafn Guðnason endaði í 79. sæti.

Bjarni Leifs vann fyrstu vikuna, varð í 154. sæti í annarri vikunni og svo í 60. sæti í þriðju og síðustu vikunni.

Rökkvi varð annar í fyrstu vikunni, í 393. sæti í annarri viku og loks í 92. sæti í þriðju viku.

Bergrós var mjög sátt þegar hún gerði upp árangur sinn á samfélagsmiðlum.

„Andrúmsloftið hjá CrossFit Reykjavik var magnað og ég hafði ótrúlega gaman af því að keppa með hópnum. Þetta var svo skemmtileg leið til að hefja tímabilið,“ skrifaði Bergrós.

„Að lenda í sautjánda sæti á heimsvísu þýðir mikið fyrir mig. Það sýnir að öll vinnan sem ég hef lagt á mig er að skila árangri og gefur mér sjálfstraust fyrir framhaldið. Ég er stolt af því hversu langt ég er komin en er alltaf hungruð í meira,“ skrifaði Bergrós.

„Ég er spennt fyrir því að halda áfram að byggja mig upp og sjá hvað þetta ár ber í skauti sér,“ skrifaði Bergrós.