Vals­menn í undanúrslitaeinvígið á móti KA

Valur sló HK út 2-0 eftir tvo hörkuleiki en sömu sögu var að segja af verðandi mótherjum þeirra í KA sem slógu ÍBV út 2-0 eftir tvo hnífjafna leiki. Liðin mætast því í undanúrslitunum í ár.

Valur vann fjögurra marka sigur á HK í Kórnum í kvöld, 32-28, eftir að hafa verið einu marki yfir í hálfleik, 14-13.

Gunnar Róbertsson var flottur í kvöld og skoraði tíu mörk fyrir Val úr aðeins þrettán skotum. Bjarni Í Selvindi var með fjögur mörk eins og Arnór Snær Óskarsson sem var einnig með sex stoðsendingar. Þorgils Jón Svölu Baldursson og Daníel Örn Guðmundsson skoruðu báðir einnig fjögur mörk.

Björgvin Páll Gustavsson varði þrettán skot í markinu.

Sigurður Jefferson Guarino skoraði mest fyrir HK eða sjö mörk en Ágúst Guðmundsson var með sex mörk og Haukur Ingi Hauksson skoraði fimm mörk eins og Tómas Sigurðarson.

HK-menn bitu frá sér og voru komnir í 16-14 eftir að hafa skorað þrjú fyrstu mörk seinni hálfleiksins.

Valsmenn svöruðu því með fjórum mörkum í röð og voru þá komnir 19-16 yfir.

Leikurinn var þó langt frá því að vera búinn því HK-ingar gáfust svo sannarlega ekki upp.

Þeir minnkuðu muninn niður í eitt mark en nær komust þeir ekki og Valsmenn lönduðu sigri og farseðli í undanúrslitin.