„Þá er hann langhættulegasti leik­maður þessarar deildar“

Grindvíkingar eru deildarmeistarar og unnu báða leikina á móti Njarðvík í vetur þar sem Jordan Semple fór á kostum. Sérfræðingar Körfuboltakvölds veltu því fyrir sér hvernig Njarðvík ætlar að stoppa Semple en Stefán Árni Pálsson, umsjónarmaður Körfuboltakvölds, vildi einnig fá álit þeirra á ákvörðun Grindavíkur að skipta út Bandaríkjamanni sínum fyrir úrslitakeppnina.

Khalil Shabazz var með 23,1 stig og 5,0 stoðsendingar í leik en var látinn fara og Jeremy Pargo kom í staðinn. Pargo er með 18,8 stig og 8,5 stoðsendingar að meðaltali í fyrstu sex leikjum sínum með Grindavík.

Sýnd veiði en ekki gefin

„Fyrir fram myndi maður nú búast við því að Grindavík færi svona tiltölulega þægilega í gegnum þetta en svo er þetta náttúrulega nágrannaslagur og Njarðvíkingar hafa sýnt það svona að þeir eru sýnd veiði en ekki gefin,“ sagði Sævar Sævarsson, sérfræðingur Körfuboltakvölds.

„Einn leikmaður er náttúrulega búinn að lita úrslitakeppnina hjá okkur mjög mikið undanfarin tvö tímabil. Það er DeAndre Kane, sem er náttúrulega rosalega mörgum finnst bara vera besti leikmaðurinn í deildinni,“ sagði Stefán Árni Pálsson, umsjónarmaður Körfuboltakvölds.

Umræðan um Kane snýst oft um hvort hann missi hausinn.

Í miklu betra jafnvægi

„Það er búið að vera miklu minna af því og mér hefur fundist vera með aðeins meiri yfirvegun hjá honum en hann missir sig endrum og eins,“ sagði Sævar.

„Hann hefur verið í miklu betra jafnvægi,“ sagði Stefán.

„Enda hefur Grindavíkurliðið verið að spila mjög vel. Ég taldi það ekki vera góða ákvörðun hjá Grindavík að taka inn Pargo fyrr en maður sá hann koma í því formi sem hann kom. Þá held ég líka að með því að hafa hann þá færist meiri ró yfir Kane því það er ekki öll ábyrgðin á honum,“ sagði Sævar.

„Hemmi, eru Grindvíkingarnir líklegri til þess að verða Íslandsmeistarar núna með Jeremy Pargo heldur en þegar þeir voru með Khalil Shabazz sem spilaði hörkuvel fyrir Grindavík í vetur,“ spurði Stefán.

Önnur vídd með þessum leikmanni

„Ég held að það komi bara allt önnur vídd með þessum leikmanni,“ sagði Hermann Hauksson, sérfræðingur Körfuboltakvölds, og segir að Pargo sé betri varnarmaður.

„Hann er töluvert betri varnarmaður heldur en Shabazz finnst mér og svo er það styrkleiki hans. Þið hafið séð leiki þar sem stórir menn eru að reyna að bakka niður en þeir hagga honum ekki. Þannig að hann getur dekkað fleiri stærðir heldur en Shabazz gat gert varnarlega, sem er mjög mikilvægt þegar kemur inn í úrslitakeppni,“ sagði Hermann.

„Ég held einhvern veginn að Kane pirri sig ekki á honum eins mikið og hann var að pirra sig á Shabazz. Ég held að það sé líka bara verið að sjá til þess að Keane pirri sig sem allra minnst. Og ef það gerist þegar Keane er sem minnst pirraður, þá er hann langhættulegasti leikmaður þessarar deildar,“ sagði Hermann.

Það má horfa á alla umfjöllunina um einvígið hér fyrir ofan.