Unnið að til­lögum um lengingu brim­varnar­garða Land­eyja­hafnar

Þetta kemur fram í svörum Vegagerðarinnar  við fyrirspurn fréttastofu. Í umræðu á fundi bæjarstjórnar Vestmannaeyja um samgöngumál þann 25. mars kemur fram að ekki hafi verið hægt að dýpka í Landeyjahöfn í langan tíma vegna veðuraðstæðna.

Í bókun kemur fram að staðan á höfninni sýni hversu aðkallandi það sé að höfnin verði kláruð og jafnframt tekið fram að danska straumlínustofnunin DHI vinni nú að tillögum að breytingum á höfninni í samvinnu við Vegagerðina.

Stjórnvalda að ákveða framhaldið

Í svörum Vegagerðarinnar við fyrirspurn fréttastofu kemur fram að í lokafasa verkefnsins sé verið að skoða nokkur atriði. Til dæmis lengingu á brimvarnargörðum, byggingu garða á rifinu svokallaða rétt utan við höfnina og einnig hvort hægt sé að fara í svokallaða „buffer“ dýpkun sem felist í því að dýpkaðar verði stórar holur sitt hvoru megin við höfnina.

Verið sé að leita eftir leiðum til að auka nýtingu Landeyjahafnar með mannvirkjum, bæði hvað varðar sandburð og siglingar. Reiknað er með að niðurstöður verði kynntar nú í vor og í kjölfarið metið hvað þær kosta. Það sé síðan stjórnvalda að taka ákvörðun um framhaldið.

Nýr aðili mun sinna dýpkun frá og með haustinu

Landeyjahöfn hefur  verið lokuð síðustu vikurnar vegna ónægs dýpis í höfninni. Fyrirtækið Björgun hefur séð um dýpkun í höfninni síðustu árin en lenti í vandræðum nýlega eftir að bilun kom upp í skipinu og gat þá ekki sinnt dýpkun við mikla óánægju yfirvalda í Eyjum. 

Skip Björgunar, Álfsnes, hefur ekki unnið að dýpkun í höfninni undanfarna daga og vikur vegna veðuraðstæðna.

Nýlega voru kynntar niðurstöður úr útboði vegna dýpkun hafnarinnar á árunum 2026-2029 og var í kjölfarið samið við belgíska fyrirtækið Jan De Nul sem tekur við verkinu í haust. Fyrirtækið sinnti dýpkun í Landeyjahöfn á árunum 2015 til 2018 og sérhæfir sig í framkvæmdum sem þessum.