Shaq er að byrja með nýja troðsludeild

Á fyrsta keppnistímabili „Dunkman“ munu 24 af bestu troðsluköppum heims keppa í beinni útsendingu í glænýju deildarfyrirkomulagi um fimm hundruð þúsund dollara í verðlaunafé eða meira en 62 milljónir íslenskra króna.

„Þessir íþróttamenn eru frumkvöðlar og Dunkman-deildin mun veita þeim alþjóðlegan vettvang, raunverulega áhættu og tækifæri til að byggja upp feril við að gera það sem þeir elska. Við erum að breyta troðslum úr eins kvölds keppni í ört vaxandi atvinnuíþrótt,“ sagði Shaquille O’Neal í kynningu á nýju deildinni.

Shaquille O’Neal tekur við sem yfirmaður deildarinnar sem á að hefjast sumarið 2026.

Deildin kynnir stigakerfi í Ólympíustíl og keppnisfyrirkomulag sem nær yfir heilt tímabil, hannað til að veita atvinnumönnum í troðslum stöðuga athygli umfram hefðbundnar eins kvölds keppnir.

„Þeir bestu gegn þeim bestu, á fimm viðburðum í beinni, með stigakerfi á Ólympíustigi og með hæsta verðlaunafé í sögu troðslukeppna,“ sagði Shaq við Boardroom.