Ragnari Frey sagt upp störfum á Land­spítala

Hann kom einnig reglulega fram í fjölmiðlum þegar hann var yfirlæknir Covid-göngudeildar Landspítala. 

Ragnar greinir frá uppsögninni á Facebook-síðu sinni og segir framkvæmdastjóra á spítalanum hafa tilkynnt honum símleiðis í dag að staða Ragnars hafi verið lögð niður. Þegar hann hafi óskað eftir frekari skýringum hafi hann fengið þau svör að Landspítali væri undir ríkri aðhaldskröfu frá stjórnvöldum.

„Mér er þó til efs að mikið sparist á uppsögn minni þar sem síðustu tvo mánuði og næstu sjö er ég í launalausu leyfi,“ segir Ragnar í Facebook-færslu sinni. 

Komið að stofnun bráðadagdeildar

Ragnar hefur einnig starfað sem sjálfstætt starfandi læknir og er formaður Læknafélags Reykjavíkur. Hann komst nýverið í fréttir þegar hann vakti máls á því að starfsmenn myndu ekki fá páskaegg frá Landspítala þetta árið vegna niðurskurðar. En nú er komið að leiðarlokum.

„Ég vil fyrst og fremst þakka samstarfsfélögum mínum og svo mínum nánasta yfirmanni fyrir samstarfið liðinn áratug - það var óneitanlega gaman (og krefjandi) að starfa að þeim fjölmörgu verkefnum sem við tókumst á í sameiningu - stofnuðum bráðalyflækningadeild, COVID göngudeild, sýklalyfjaeiningu og svo núna seinast bráðadagdeild,“ segir Ragnar í yfirlýsingu sinni um uppsögnina.

Fréttin hefur verið uppfærð.