Ekur niður göngu­götu og furðar sig á stæðaleysi

Austurstrætið allt hefur verið göngugata síðan í september 2025, en breytingin er hluti af nýju skipulagi Kvosarinnar sem samþykkt var 2020. Því er öll akandi umferð um götuna bönnuð að undanskildum viðbragðsaðilum og hreyfihömluðu fólki, auk þess sem vörulosun er heimil á tilteknum tímum. 

Samkvæmt upplýsingum frá umferðardeild lögreglunnar eru dæmi um að ökumenn hafi verið sektaðir fyrir akstur niður Austurstræti en þar eru nú vegmerkingar sem sýna að akstur um götuna sé ekki leyfður.

Vegmerkingarnar við Pósthússtræti virðast þó hafa farið fram hjá Ara, sem er nýlega fluttur í miðbæinn, er hann ók niður götuna á dögunum til að taka upp myndskeið fyrir samfélagsmiðla þar sem hann hneykslast á bílastæðaleysinu við götuna.

„Það er bara hvergi hægt að finna stæði lengur hér í bænum,“ segir hann hneykslaður er hann ekur niður göngugötuna.

„Ég hef aldrei séð þig í Miðbænum“

Myndskeiðið hefur vakið allnokkra athygli og fengið rúmlega þúsund læk hvort tveggja á Facebook og TikTok. 

Auk þess hefur á þriðja hundrað lagt orð í belg í athugasemdum undir færslunni á Facebook, ýmist til þess að taka undir með Ara eða gagnrýna hann. Í hinum síðarnefnda hópi er Egill Helgason fjölmiðlamaður, sem segist aldrei eiga í vandræðum með að fá stæði í miðbænum þrátt fyrir að sækja bæinn heim nær daglega. 

„Hins vegar er vandamál þegar menn keyra á nöglum eins og heyra má í myndbandinu. Og - ég hef aldrei séð þig í Miðbænum þar sem ég bjó í 23 ár svo það er erfitt að skilja þessar skyndilegu áhyggjur,“ skrifar Egill Helgason.

Ari bregst við þessum athugasemdum Egils og segist vissulega hafa búið í miðbænum á 10. áratugnum. Hvað nagladekkin varðar viðurkennir Ari að komið sé að dekkjaskiptum, en að hann eigi þó vissulega stundum einnig erindi í efri byggðir borgarinnar „þar sem snjór er lítið mokaður nema af hjólastígum og mikill klaki,“ skrifar Ari. „Síðast snjóbylur fyrir viku síðan. En tekið til greina.“

Áttuðu sig ekki á því að Austurstræti væri göngugata

Í samtali við fréttastofu segir Ari að hvorki hann né tökuteymið hafi áttað sig á því að um göngugötu væri að ræða.

„Ekkert af okkur sem vorum að vinna þetta heimildarvídjó um stöðu þessara mála í miðborginni áttuðum okkur á því,“ segir hann. Hann segir að myndbandið hafi að mestu vakið jákvæð viðbrögð, en það hafi fengið yfir 140.000 áhorf á Facebook, Instagram og TikTok.

„Auðvitað hafa verið svo tíðar breytingar á ýmsu varðandi umferðina í miðborginni að það hefur ruglað fólk í ríminu og þar á meðal mig,“ heldur hann áfram.

Vilja aftur umferð um Laugarveg

„Til dæmis bara eins og hefur verið á Laugaveginum. Fólk var nú lengi að átta sig á því hvar ætti að keyra niður Laugaveginn og hvar ætti að keyra upp Laugaveginn eftir að það var farið að rugla með það,“ segir hann og vísar til þess þegar lokað var fyrir umferð að hluta á Laugarvegi.

Ari telur að Reykjavík hafi tekið burt of mörg stæði frá borgarbúum síðustu ár, hvort sem sé við Austurstræti, Laugarvegi eða Skólavörðustíg. Þá bendir hann á að miklar breytingar hafi orðið í bænum að undanförnu, til dæmis hafi rótgrónar verslanir horfið úr bænum, og kennir hann bílastæðaskorti þar að hluta til um. Þá hafi veitingamenn einnig kvartað. Hann telur það hafa verið mistök að loka fyrir umferð að hluta á Laugarvegi.

Vill Miðflokkurinn þá að opnað verði aftur fyrir umferð um Laugarveginn?

„Já, ég myndi vilja gera það. Það væri langfarsælast og það væri einstefna bara frá Hlemmi og niður á Lækjargötu.“

Frétt hefur verið uppfærð með viðbrögðum Ara.