Bald­vin á samningi hjá Nike: „Hélt ég myndi aldrei ná svona langt“

Samningur Bald­vins við Nike gildir til næstu þriggja ára en um er að ræða fyrsta at­vinnu­manna­samning hlauparans öfluga og segja má að frábært hlaup hans í Valencia í upp­hafi árs, þar sem Bald­vin varð fyrsti Ís­lendingurinn í sögunni til að hlaupa tíu kíló­metra á undir tuttugu og átta mínútum, hafi lokkað Nike að borðinu.

„Þetta er búið að vera mark­miðið hjá mér síðustu tvö til þrjú árin,“ segir Bald­vin í sam­tali við íþrótta­deild. „Ég er alltaf búinn að vera mjög nálægt því að ein­hver myndi vilja bjóða mér svona al­vöru at­vinnu­manna­samning. Að hafa það næstu þrjú árin, fram yfir Ólympíu­leikana er alveg frábært. Hvað þá með Nike.“

Draumurinn síðustu ár

Stóra mark­miðið hjá Bald­vini er ein­mitt að komast á Ólympíu­leikana árið 2028 en fram­undan er EM í Birming­ham í sumar en Bald­vin vann sér inn sæti á mótinu með sínu frábæra hlaupi í Valencia.

„Ég myndi segja að þetta sé drauma­merkið. Ég var með fata­samning við H-verslun, sem er að flytja inn Nike vörur á Ís­landi, í fyrra. Ástæðan var sú að mér finnst skórnir hjá Nike betri en allir aðrir skór. Ég get ekki sagt að þetta sé æsku­draumur því ég hélt aldrei að ég myndi komast svona langt. En þetta hefur klár­lega verið draumurinn síðustu árin.“

Var nálægt því að draga saman seglin

Bald­vin að ná eftir­tektar­verðum árangri til þessa í um­hverfi þar sem hann hefur þurft að skrapa saman styrkjum hér og þar til þess að halda hlaupa­draumnum á lífi. Núna hverfa þær áhyggjur en annars konar pressa kemur inn. Áhugamálið er orðið að at­vinnu að fullu.

„Ég hef alltaf þurft að pússla hverju ári saman með sam­störfum og styrktaraðilum. Að hafa Nike með sér í liði núna gerir það að verkum að pússlið er nánast komið næstu þrjú árin.

Ég myndi segja að í fyrra hafi ég verið smá tæpur á því, ef árið hefði ekki gengið mjög vel, að fara hætta gefa allt gjör­sam­lega hundrað pró­sent í þetta. Þetta getur verið at­vinnan næstu árin.“