„Að tala sig inn á þessa niður­stöðu finnst mér ó­trú­legt“

Allt var jafnt í hálfleik, 16-16, en snemma í síðari hálfleik fékk lykilmaður FH, Jón Bjarni Ólafsson, rautt spjald fyrir að toga Þorgils Jón, leikmann Vals, með sér í gólfið eftir árekstur þeirra tveggja þegar FH var að bruna upp í sókn. Eins og fram hefur komið var Sigursteinn afar ósáttur með þá niðurstöðu, en í kjölfarið náði Valur undirtökunum í leiknum og létu forystu sína aldrei af hendi.

Að því sögðu fannst Sigursteini leikur sinna manna ekki hafa verið nægilega góður þegar á móti blés.

„Að því sögðu þá ræð ég ekkert yfir dómum eða dómgæslu og því algjör óþarfi að tjá sig um það. Ég get aftur á móti tjáð mig um það að FH-liðið brást ekki nógu vel við þessu augnabliki og það er eitthvað sem við getum farið yfir og munum gera. Við þurfum að nota helgina vel og mæta klárir í Krikann á mánudaginn.“

„Við erum bara ekki nógu sterkir á svellinu þegar reynir á okkur í seinni hálfleik. Við klárum þennan leik ekki nógu vel. Ég hélt við ætluðum að búa okkur til augnablik í stöðunni 24-22, en aftur misstum við þá frá okkur. Það er dýrt að tapa frumkvæði í svona leikjum og við vorum ekki nógu og mikið með það í dag. Valsararnir voru með það í dag og þess vegna eru þeir verðskuldaðir sigurvegarar úr þessum leik. En það er nýr dagur á mánudag og ég bara býst við að FH-ingar flykkist á bak við okkur og við svörum með góðri frammistöðu á vellinum.“

En geta FH-ingar tekið eitthvað með sér úr þessum leik yfir í leikinn á mánudaginn?

„Akkúrat núna er maður bara neikvæður en þegar við klippum þetta þá munum við finna góð móment og svo aðra hluti sem vantar upp á. Heilt yfir vantaði bara upp á of marga hluti, bæði sókn og vörn, en við rísum upp eftir þetta,“ sagði Sigursteinn Arndal að lokum.