Bensín­verð hefur lækkað

Virðisaukaskattur var lækkaður úr 24 prósentum í 11 prósent og verður það út sumarið eða til 31. ágúst samkvæmt tímabundinni heimild sem gefin var í lögum sem samþykkt voru á Alþingi. Samkeppniseftirlitinu hefur verið falið að fylgjast með því að lækkunin skili sér að fullu til neytenda. 

Fjallað var um það fyrir helgi að Samkeppniseftirlitið muni senda olíufélögum bréf eftir helgi og móta framkvæmd eftirlitsins í framhaldinu.

20 til 30 króna lækkun

Á síðunni gasvaktin.is, sem sækir verð á eldsneyti hjá flestum olíufélögum, má sjá að verð hefur lækkað eftir virðisaukaskattsbreytinguna um 26 til 27 krónur lítrinn á bensíni og dísil um 30 til 32 krónur.

Samkvæmt heimasíðunni er ódýrasti lítrinn af bensíni hjá Costco þar sem hann kostar 198,3 krónur en þar þarf meðlimakort til að kaupa bensín. Á almennum bensínstöðvum er ódýrasti lítrinn hjá Orkunni þar sem hann kostar 202,3 krónur. Hjá Atlantsolíu er hann á 202,4 krónur.

Ódýrasti lítrinn af dísilolíu er einnig hjá Costco á 240,6 krónur en á almennum bensínstöðvum er ódýrasti lítrinn hjá Orkunni þar sem hann kostar 244,6 krónur. Ekki munar miklu hjá Atlantsolíu þar sem hann kostar 244,7 krónur. Hægt er að skoða verðið betur hér.

Lækkaði um áramót en hækkaði svo

Bensínverð lækkaði verulega um áramótin þegar innleiðing kílómetragjaldsins tók gildi. Í frétt sem skrifuð var á nýársdag kom fram að á stöð Orkunnar við Laugaveg í Reykjavík hafi verð á bensíni verið 308,5 krónur á næstsíðasta degi nýliðins árs en lítraverðið var komið í 212 krónur eftir miðnætti á nýju ári. Lækkunin nam um 31 prósentum. Að sama skapi fór verð á dísillítranum úr 314,2 krónum í 226,9 krónur sem var um 28 prósenta lækkun.

Eftir að stríð hófst í Íran hækkaði það þó fljótt aftur. Í verðlagseftirliti ASÍ var til dæmis greint frá því í upphafi mánaðar að bensínverð hefði hækkað um 13 prósent frá áramótum eða um 24 krónur.

Þar kom fram að mestar hækkanir höfðu þá verið á bensínlítranum hjá Costco sem var þó með lægsta eldsneytisverðið. Þar hækkaði lítrinn um 39 krónur á sama tíma og lægsta verð hækkaði um 27 til þrjátíu krónur hjá söluaðilum með fleiri en eina dælustöð í mars.