Allt öðru­vísi úr­slita­keppni og stærri Olís-deild kvenna

Þetta má lesa úr þingskjölum frá 69. ársþingi HSÍ sem fram fór í Virkinu við Safamýri í gær.

Handknattleiksfélögin í landinu samþykktu lagabreytingu sem gerir stjórn HSÍ og mótanefnd samandsins kleift að útfæra mótafyrirkomulag í reglugerðum, í stað þess að breyta þurfi lögum til að gera breytingar á mótunum.

Mögulegar á mótunum verða lagðar fyrir ársþing, fyrir 1. mars ár hvert og taka þá gildi frá og með næstu leiktíð.

Samhliða þessu voru samþykktar ályktanir um hvernig félögin vildu að fyrirkomulagið yrði á næstu leiktíð og framfylgi stjórn þeim vilja, eins og búast má við, breytast úrslitakeppnirnar mikið.

Átta liðum skipt í tvo riðla

Átta lið munu fara í úrslitakeppnina en þeim verður skipt í tvo fjögurra liða riðla. Efstu tvö lið úr deildarkeppninni byrja með tvö stig í riðlinum, og liðin í 3. og 4. sæti með eitt stig hvort, og endi lið jöfn að stigum í riðli þá endar það lið ofar sem endaði ofar í deildarkeppninni.

Tvö lið úr hvorum riðli fara svo í undanúrslit þar sem spiluð verða einvígi líkt og síðustu ár.

Úrslitakeppnin ætti að vera með sama sniði hjá körlum og konum því samþykkt var að fjölga liðum í efstu deild kvenna úr átta í tíu.

Þetta þýðir að Gróttu og Víkingi verður boðið að taka sæti í efstu deild, eftir að hafa náð bestum árangri í Grill 66-deildinni í vor án þess að komast upp. Selfossi, eina liðinu sem féll úr Olís-deildinni, gæti verið boðið sæti ef Grótta eða Víkingur afþakkar.