FIFA stefni öryggi leik­manna í hættu á HM

Í opnu bréfi sem vísindamennirnir, sem starfa á sviði lýðheilsu, loftslagsmála og íþrótta, skrifuðu til forkólfa FIFA segir að regluverkið sem sambandið hefur sett á þessu sviði sé úr takt við ríkjandi vísindi og óverjanlegt.

Heimsmeistaramótið í fótbolta fer fram í Bandaríkjunum, Kanada og Mexíkó og hefst þann 11.júní næstkomandi. 

Kalla vísindamennirnir eftir því að FIFA efli viðbrögð sín, þar með talið með því að lengja svokölluð kælihlé í leikjunum sjálfum á HM sem og setja á skýrari verkferla þegar kemur að því að mögulega þurfa fresta leikjum sökum öfgafullra veðurfarslegra aðstæðna. 

Talið er að hátt hitastig muni valda miklum vandræðum á heimsmeistaramótinu í sumar og vara sérfræðingar við því að hitastigið á fjórtán af sextán völlum mótsins geti farið yfir hættumörk. Það í bland við rakastig, vindstyrk og styrkleika sólarinnar geti skapað aðstæður þar sem reyna mun mikið á leikmenn. 

Það sem vísindamennirnir vilja að FIFA geri:

• Fresti leikjum þegar að hitastig nái 28 gráðum skv. WBGT
• Lengi vatns/kælipásur upp í sex mínútur að lengd.
• Bæti kæliaðstöðu fyrir leikmenn.
• Uppfæri reglulega öryggisviðmið sín.

FIFA fer eftir Wet Bulb Globe Temperature (WBGT) staðlinum þar sem reiknað er út álag á mannslíkamann sökum hita og rakastigs. Samkvæmt WBGT er 28 gráðu hiti þröskuldurinn þegar að álag á líkamann sökum hita verður að vandamáli fyrir íþróttafólk. FIFA hins vegar miðar við 32 gráðu hita, fjórum gráðum meira en WBGT gerir ráð fyrir.