Skipað að ganga frá samningi við Al­freð sem fyrst

Núverandi samningur Alfreðs rennur út eftir HM á heimavelli Þýskalands 2027 en Bild greinir frá því að vilji sé til staðar fyrir eins árs framlengingu, fram yfir Ólympíuleikana í Los Angeles 2028.

Ákvörðunin er sögð hafa verið tekin í síðustu viku á fundi forkólfa þýska handknattleikssambandsins. Forstjórinn, forsetinn og deildarforsetinn gáfu allir grænt ljós samkvæmt Bild en varaforsetinn Ingo Meckes var óviss.

Meckes er sagður hafa fundað síðustu vikur með Florian Kehrmann, þjálfara Lemgo, og Bennet Wiegert, þjálfara Magdeburg, í von um að sannfæra þá um að taka starfið að sér á næsta ári.

Þegar það gekk ekki á Meckes að hafa haft samband við Andy Schmid, þjálfara Sviss, aftur án árangurs.

Nú beinast spjótin að varaforsetanum Meckes og samkvæmt Bild hefur honum verið skipað, af hinum forystumönnum sambandsins, að ganga frá nýjum samningi við Alfreð sem fyrst.

Alfreð hefur áður lýst yfir áhuga á því að framlengja samning sinn. Hann hefur verið landsliðsþjálfari Þýskalands frá því árið 2020. Undir hans stjórn vann Þýskaland silfurverðlaun á ÓL 2024 og EM 2026.