Helmingur Air At­lanta seldur úr landi

Í fréttatilkynningu þess efnis segir að samhliða eignist Atlas allt hlutafé í Arctic Aircraft Leasing ehf. og Northern Lights Leasing ehf., sem séu fjárfestingafélög innan samstæðunnar og fari með eignarhald flugvéla félagsins. Seljendur séu Hannes Hilmarsson, Geir Valur Ágústsson, Stefán Eyjólfsson og Helgi Hilmarsson, sem eignuðust Air Atlanta og tengd félög árið 2007.

„Það eru merk tímamót fyrir okkur að eignast meirihluta í Air Atlanta og það undirstrikar hvaða trú við höfum á starfsfólki okkar sem og framtíð félagsins. Jafnframt er það stór áfangi fyrir Air Atlanta að fá inn jafn öflugan og reyndan alþjóðlegan flugrekanda eins og Atlas sem hluthafa. Viðskiptin styrkja því Air Atlanta enn frekar og opna á ný tækifæri til aukins vaxtar á síbreytilegum alþjóðamarkaði,“ er haft eftir Baldvin forstjóra.

Kveðja stoltir

Engar breytingar verði á daglegum rekstri félagsins, staðsetningu eða starfsmannahaldi og núverandi stjórnendateymi muni áfram stýra uppbyggingu félagsins með sama hætti og áður.

„Air Atlanta stendur í dag sterkara en nokkru sinni fyrr og við erum afar þakklátir fyrir þau tæpu tuttugu ár sem við höfum átt samleið með félaginu. Fyrstu árin voru krefjandi, en með samheldni og ótrúlegri vinnusemi starfsfólks tókst að byggja upp sterkt, leiðandi alþjóðlegt flugfélag sem á djúpar rætur í íslenskri flugsögu. Við kveðjum með stolti, fullvissir um að nýir eigendur muni halda áfram að byggja á þeim trausta grunni sem lagður hefur verið,“ er haft eftir Hannesi Hilmarsson, fráfarandi formanni stjórnar.

Haft er eftir Michael Steen, forstjóra Atlas Air Worldwide, að viðskiptin endurspegli nálgun Atlas á markaði sem einkennist af takmörkuðu framboði á breiðþotum í frakt- og farþegaflugi.

Kaupverðið trúnaðarmál

„Með fjárfestingunni styrkjum við stöðu Atlas í Evrópu með reynslu og rekstrarmódeli Air Atlanta. Samstarfið mun auka aðgengi að flugvélum og styrkja enn frekar getu okkar til að skapa verðmæti fyrir viðskiptavini, starfsfólk og hagaðila um allan heim. Air Atlanta hefur byggt upp sterkt orðspor í gegnum árin og við hlökkum til samstarfs við framúrskarandi teymi félagsins. Við teljum að þetta samstarf muni styrkja bæði félög og skapa sterka stöðu til áframhaldandi árangurs á alþjóðlegum flugmarkaði.“

Loks segir að gert sé ráð fyrir að viðskiptunum ljúki á þriðja ársfjórðungi 2026, að uppfylltum venjubundnum skilyrðum, þar á meðal samþykki eftirlitsaðila. Kaupverð sé trúnaðarmál.

Fréttin hefur verið uppfærð.