Erna Sól­ey Norður­landa­meistari og Bryn­dís eltir Ísold á HM

Ólympíufarinn Erna Sóley Gunnarsdóttir varð Norðurlandameistari í kúluvarpi í dag en hún kastaði lengst 16,62 metra, eða 54 sentímetrum lengra en hin finnska Minttu Laurila sem varð í 2. sæti. Erna átti einnig kast upp á 16,40 metra en Íslandsmet hennar frá því á Akureyri fyrir tveimur árum er 17,91 metrar.

Guðrún Karitas Hallgrímsdóttir vann silfur í sleggjukasti en hún kastaði 72,92 metra í fjórðu tilraun. Aðeins hin danska Katrine Koch Jacobsen kastaði lengra eða 74,79 metra.

Guðrún setti síðast Íslandsmet í apríl þegar hún kastaði 73,88 metra en þær Elísabet Rut Rúnarsdóttir hafa skipst á að eiga metið á þessu ári.

Ólympíufarinn Guðni Valur Guðnason varð í 2. sæti í kringlukasti með 61,20 metra kasti í sjöttu og síðustu tilraun, aðeins 11 sentímetrum á eftir Norðmanninum Ola Stunes Isene sem varð Norðurlandameistari.

Sindri Hrafn Guðmundsson varð einnig í 2. sæti í spjótkasti en hann kastaði 75,84 metra, í fyrstu tilraun. Aðeins Finninn Topias Laine kastaði lengra eða 79,89 metra.

Íslendingunum gekk sérstaklega vel í kastgreinunum á mótinu og í gær varð Hilmar Örn Jónsson í 2. sæti í sleggjukasti, með kasti upp á 75,10 metra. Ingibjörg Sigurðardóttir komst einnig á verðlaunapall í gær en hún varð þá í 3. sæti í 400 metra grindahlaupi, á 62,16 sekúndum.

Bryndís inn á HM U20 og Ísold náði öðru lágmarki

Íslendingar stóðu sig einnig vel á European Challenger Championships sem fram fór í Mónakó í gær.

Stærstu tíðindin komu í spjótkasti kvenna og 100 metra grindarhlaupi kvenna. Bryndís Embla Einarsdóttir kastaði spjótinu 51,28 metra, bætti sinn besta árangur og hafnaði í 2. sæti, og tryggði sér um leið farseðilinn á HM U20 í Eugene í ágúst.

Ísold Sævarsdóttir átti einnig frábæran dag. Hún hljóp 100 metra grindahlaup á 14,09 sekúndum, bætti sig og hafnaði í 2. sæti. Árangurinn er jafnframt undir lágmarki á HM U20 sem er 14,10 sekúndur en Ísold hafði þegar tryggt sér farseðilinn á mótið í sinni aðalgrein sem er sjöþraut. Ísold keppti einnig í kúluvarpi í Mónakó og varð 4. með 12,26 metra kasti, og í langstökki þar sem hún varð í 5. sæti með 5,80 metra stökki.

Garðar Atli Gestsson bætti sinn besta árangur í spjótkasti karla þegar hann kastaði 65,35 metra og hafnaði í 3. sæti. Keppt var með 800 gramma spjóti en til að ná lágmarki á EM U18 þarf Garðar hins vegar að kasta 62,00 metra með 700 gramma spjóti, þannig að árangurinn sýnir að hann er í góðu formi þó hann þurfi enn að ná lágmarkinu við réttar aðstæður.

Fleiri Íslendingar náðu í verðlaun á mótinu í Mónakó. María Rún Gunnlaugsdóttir hljóp 100 metra grindahlaup á 14,19 sek, sem er persónulegt met, og varð í 3. sæti. Hún varð einnig 3. í hástökki með 1,66 metra stökki. Christina Alba M. Hafliðadóttir varð svo í 2. sæti í 100 metra hlaupi á 11,91 sekúndum.