„Hverjir hafa efni á því að kaupa gramm af kókaíni?“

Í dag var greint frá tveimur stórum málum þar sem lögregla lagði hald á fíkniefni í tuga kílóa tali; annars vegar var 106 kílóum af kókaíni smyglað með álflutningaskipi til Straumsvíkur og hins vegar var 56 kílógrömmum af amfetamíni smyglað til Íslands með Norrænu.

Í tilfelli kókaínsmyglsins voru níu manns handteknir, þrír íslenskir ríkisborgarar og sex erlendir. Fíkniefnamagnið úr álskipinu er metið upp á hátt í þrjá milljarða króna. Er þetta mesta kókaínmagn sem lögregla hefur lagt hald á.

Í tilfelli Norrænu höfðu fíkniefnin verið falin í húsbíl og ökumaður hans, sem er erlendur ríkisborgari á sextugsaldri að sögn lögreglu, handtekinn á Norðurlandi fyrr í mánuðinum, en í bílnum hafi einnig fundist átta kíló af kókaíni, þrjú kíló af ketamíni, eitt kíló af kristal metamfetamíni og kíló af „bleiku kókaíni“, sem er blanda af ketamíni og MDMA.

Skalinn þegar sprunginn

Ævar Pálmi Pálmason, aðstoðaryfirlögregluþjónn miðlægrar rannsóknardeildar, hjá rannsóknardeild lögreglunnar á höfuðborgarsvæðinu segir að lögregla hafi lagt hald á efnin úr Norrænu 12. júní. 

Ævar segir að bleika kókaínið svokallaða sé ekki algengt á götum Íslands.

Árið 2025 var metár í haldlagningu fíkniefna en nú er nýtt met slegið. „Sá skali er sprunginn nú þegar,“ segir Ævar en hann kvaðst ekki hafa nákvæma tölu á magnið.

Af hverju er svona mikil eftirspurn?

Ævar segir að mikil eftirspurn sé eftir þessum fíkniefnum í dag.

„Það er gríðarleg eftirspurn í samfélaginu og ég held að það sé stóra spurningin: Af hverju er svona mikil eftirspurn eftir þessum fíkniefnum?“

Hann segir lögreglu hafa mikla þekkingu á fíkniefnamarkaðnum.

„Við erum með nokkuð góðan púls á ástandinu og markaðnum hverju sinni. Við finnum það alveg eftir svona stórar haldlagningar að það skapast þurrð á markaðnum. Við sjáum það líka í okkar störfum hér um helgar og tengt skemmtanalífinu að það er gríðarleg fíkniefnaneysla sem fylgir því.“

Hann segir lögregluna nógu vel í stakk búna til að taka á þessum málum, sem og tollgæslan og önnur löggæsluyfirvöld, en gæti alltaf bætt við sig til dæmis með tækjum eða frekari mannafla.

Hann segir að margt þurfi til þess að stemma stigu við fíkniefnasölu hér á landi.

„Eins og ég kom inn á hér áðan þurfum við sem samfélag að spyrja okkur og líta inn á við: Af hverju er þessi gríðarlega eftirspurn? Hverjir hafa efni á því að kaupa gramm af kókaíni, sem kostar tuttugu til tuttugu og fimm þúsund, jafnvel fleiri en eitt gramm um hverja helgi og jafnvel í miðri viku líka?“