Infantino spenntur fyrir því að fjölga liðum á HM í 64

Nú stendur yfir fyrsta heimsmeistaramótið með 48 liðum. Infantino kveðst ánægður með hvernig þetta mót hefur gengið og segir forsendur fyrir því að fjölga liðum á HM enn frekar, í 64.

„Þetta eru allt mál sem við munum skoða eftir HM. Þegar við skipuleggjum HM er mikilvægt að skipuleggja það fyrir allan heiminn, ekki bara Evrópu og Suður-Ameríku, heldur alla. Allar þjóðir ættu að geta dreymt um að komast á HM,“ sagði Infantino.

„Þú sérð hversu góð liðin eru og þau verða betri og betri um allan heim. Ef þú gefur minni þjóðum ekki tækifæri til að keppa á HM hafa þau ekki hvatningu til að bæta sig.“

Hugmyndin um 64 liða var fyrst sett fram af knattspyrnusambandi Suður-Ameríku í fyrra. Enn hefur engin ákvörðun verið tekin um að fjölga þátttökuliðum á HM 2030 um sextán en hún mætir andstöðu hjá knattspyrnusamböndum Evrópu, Asíu og Norður- og Mið-Ameríku.

Næsta heimsmeistaramót fer fram í Portúgal, Spáni og Marokkó 2030. Fyrstu þrír leikir mótsins verða þó spilaðir í Argentínu, Úrúgvæ og Paragvæ til að fagna aldarafmæli HM.