Björg­vin Karl vann sitt þriðja brons á heimsleikunum

Björgvin Karl og félagar hans í norska liðinu CrossFit Oslo Kriger urðu í þriðja sæti en liðið átti flottan endasprett og nálgaðist efstu liðin í lokin.

CrossFit Whip varð heimsmeistari með 1055 stig en CrossFit Mayhem varð í öðru sæti með 1030 stig. Lið Björgvins Karls endaði með 940 stig.

Lið CrossFit Reykjavíkur gaf aðeins eftir í lokin og varð að sætta sig við að enda í fjórtánda sæti af tuttugu liðum.

Þetta eru þriðju bronsverðlaun Björgvins Karls á heimsleikunum en hann varð tvisvar sinnum í þriðja sæti í einstaklingskeppninni, fyrst árið 2015 og svo aftur árið 2019.

Bergrós Björnsdóttir datt líka aðeins niður stigatöfluna á lokasprettinum eftir afar krefjandi daga en hún var nýliði á leikunum í ár.

Bergrós endaði eins og áður sagði í 18. til 19. sæti með 647 stig en hún var aðeins fjórum stigum frá næsta sæti fyrir ofan. Bergrós fékk jafnmörg stig og Aline Wirz frá Sviss.

Bretinn Aimee Cringle varð heimsmeistari kvenna í fyrsta sinn en hún kemur frá eyjunni Mön. Cringle var mögnuð á þessum heimsleikum og vann afar sannfærandi sigur en í öðru sæti varð Emma Lawson frá Kanada og Bretinn Lucy Campbell varð þriðja. Engin bandarísk kona komst því á pall en Alex Gazin varð fjórða.

Hér fyrir neðan má sjá útsendingu frá lokadeginum.