Handboltamaður Ís­lands­meistari í há­stökki: „Maður veit aldrei hvað maður getur“

Kristófer hafði aldrei prófað hástökk áður en hann ákvað að kíkja á æfingu hjá frjálsíþróttadeild Ármanns í byrjun sumars.

Alla jafnan er Kristófer hornamaður í handbolta. Hann hefur verið í stóru hlutverki hjá liði Víkings undanfarin ár og verður hluti af liðinu sem vann sér inn sæti í úrvalsdeild karla í vetur.

Þegar handboltinn fór í sumarfrí ákvað Kristófer að finna sér eitthvað meira að gera.

„Það voru engar æfingar og mig langaði að gera eitthvað meira, prófa eitthvað nýtt. Ég sendi bara á þjálfarann hjá Ármanni og hann tók á móti mér, sá eitthvað í mér. Þannig að ég ákvað bara að bomba á það,“ sagði Kristófer í viðtali sem var sýnt í Sportpakka Sýnar í gærkvöld og má sjá hér fyrir neðan.

Kristófer segir hástökkið og hornamennsku í handboltanum fara vel saman.

„Já ég hoppa hátt og hleyp, þetta passar mjög vel við handboltann, það vantar bara kastið og þá væri þetta nákvæmlega eins.“

Hann stefnir á að halda hástökksferlinum áfram samhliða handboltanum.

„Ég ætla að reyna, ef ég hef tímann í það. Mæti kannski einu sinni í viku og keppi á mótum þegar ég get.“

Þá er ekki útilokað að hann reyni fyrir sér í einhverjum öðrum frjálsum íþróttum.

„Kannski spretthlaupið, kannski langstökk. Ég á bara eftir að prófa þetta, maður veit aldrei hvað maður getur.“