Fótbolti

Rúnar Alex fékk á sig fjögur þegar FCK tapaði fyrsta deildarleiknum

Ingvi Þór Sæmundsson skrifar
Rúnar Alex Rúnarsson hefur spilað síðustu þrjá leiki FC Kaupmannahafnar.
Rúnar Alex Rúnarsson hefur spilað síðustu þrjá leiki FC Kaupmannahafnar. epa/PIRJO TUOMINEN

FC Kaupmannahöfn tapaði sínum fyrsta leik í dönsku úrvalsdeildinni á tímabilinu þegar liðið steinlá fyrir Viborg, 4-0, í dag. Rúnar Alex Rúnarsson stóð á milli stanganna hjá FCK og Viktor Bjarki Daðason kom inn á um miðbik seinni hálfleiks.

Viborg komst yfir strax á upphafsmínútunni þegar Birger Meling skoraði sjálfsmark.

Dorian Hanza skoraði annað mark Viborg á 8. mínútu og átta mínútum síðar gerði Asker Beck þriðja mark heimamanna sem gátu ekki beðið um betri byrjun á leiknum.

Charly Horneman skoraði fjórða mark Viborg á 68. mínútu. Fimm mínútum áður hafði Viktor Bjarki komið inn á sem varamaður hjá FCK.

Hann sneri aftur eftir meiðsli í Evrópuleik gegn Inter Turku á fimmtudaginn og fékk svo tæpan hálftíma í leiknum í dag.

FCK hafði unnið fyrstu þrjá deildarleiki sína á tímabilinu en mátti þola sitt fyrsta tap á tímabilinu í dag. Liðið er í 5. sæti með níu stig eftir fjóra leiki. Viborg er á toppnum með tíu stig eftir fimm leiki.

Danski boltinn

Mest lesið


Fleiri fréttir

Sjá meira


×

Mest lesið