Eyjakonur og Haukar meistarar sam­kvæmt spánni

Á fundinum skrifaði Jón Halldórsson, formaður HSÍ, undir samninga við helstu bakhjarla sambandsins í keppnum á vegum sambandsins. Nýr samningur við Olís er til þriggja ára og samningurinn við CCEP, vegna Powerade-bikarsins, er til næstu fimm ára.

ÍBV, sem til að mynda hefur fengið landsliðskonuna og Þýskalandsmeistarann Andreu Jacobsen í sínar raðir í sumar, er spáð sigri í Olís-deild kvenna. Haukar komu þar næst á eftir en ríkjandi Íslands- og bikarmeisturum Vals er spáð 3. sæti.

Breyting varð á deildinni skömmu fyrir mót þegar Selfoss tók sæti Víkings eftir að Víkingar ákváðu að draga lið sitt úr keppni.

Haukum er spáð sigri í Olís-deild karla en þar á eftir koma liðin tvö sem mættust í æsispennandi úrslitaeinvígi í vor; Íslandsmeistarar Vals og FH sem nú leikur undir stjórn Arons Pálmarssonar. Selfossi er spáð botnsætinu og Stjörnunni næstneðsta sæti.

Leiktíðin hefst í kvöld með Meistarakeppni HSÍ þar sem kvennalið Vals og Hauka mætast í N1-höllinni á Hlíðarenda klukkan 18, og svo karlalið félaganna á sama stað klukkan 20:15.

Valskonur eru ríkjandi Íslands- og bikarmeistarar og Valsmenn ríkjandi Íslandsmeistarar en karlalið Hauka ríkjandi bikarmeistari.