„Þetta móment á þessum stað á móti KA fyrir mitt fé­lag að sjá fögnuðinn og upp­lifa hann var bara æðis­legt“

Oddur Grétarsson, leikmaður Þórs, skoraði þrjú mörk úr þremur skotum ásamt því að standa vörnina vel. Hann var rétt að ná sér niður úr fagnaðarlátunum þegar blaðamaður náði tali af honum.

Hvernig líður þér eftir þessa veislu?

„Bara frábærlega, þetta var bara geðveikt, maður var með gæsahúð hvort sem maður sat á bekknum eða inn á. Geðveik umgjörð hjá KA mönnum eins og við var að búast. Þessir leikir, það er bara heiður að fá að taka þátt í svona leik og svo að vinna það er líka æðislegt.“

Þú ert væntanlega búinn að vera bíða spenntur eftir þessum leik í tvær vikur?

„Kannski í sex daga, eftir HK leikinn, við þurftum fyrst að hugsa um hann og jú ég viðurkenni það þó maður sé orðinn 36 ára það er alltaf fiðringur og það er extra fiðringur fyrir svona leik þannig það hættir ekkert og má ekkert hætta, annars væri ég ekki lengur í þessu“

Slæm byrjun Þórs

Þórsarar byrjuðu leikinn mjög illa og voru 5-1 undir eftir sjö mínútur þegar Daniel Birkelund tók leikhlé fyrir Þór. KA komst svo í 7-2 áður en Þórsarar rönkuðu við sér og úr varð alvöru leikur.

„Það var eins og það væri einhver sviðsskrekkur í mönnum, við vorum að skjóta hræðilega, bara taka lélegar ákvarðarnir og bara skot á vitlausum tempóum og þeir náttúrulega skoruðu úr hraðaupphlaupum líka auðveld mörk. Við þurftum bara að endurstilla og mér fannst við gera það og gera það vel. Sýndum karakter að komast aftur inn í leikinn og gott betur og síðan vara bara ekkert aftur snúið, mér fannst við bara vera betri í dag svona heilt yfir.“

Hefur upplifað margt en þetta er einstakt

Þegar lokaflautið gall í húsinu braust úr gríðarlegur fögnuðu meðal stuðningsmanna Þórs og leikmanna sem hlupu í hornið til þeirra og úr urðu mikil fagnaðarlæti og öskur og var Oddur því næst spurður hvernig tilfinningin væri að upplifa þetta augnablik sem uppalinn leikmaður Þórs í KA-heimilinu.

„Ég get ekkert lýst því sko, þetta var bara geðveikt, maður er bara með gæsahúð. Ég hef upplifað margt á mínum ferli en þetta móment á þessum stað á móti KA fyrir mitt félag að sjá fögnuðinn og upplifa hann var bara æðislegt“.

Þórsarar fengu fyrir tímabilið fjóra danska leikmenn til að breikka og styrkja hópinn. Oddur segir þá koma vel inn í liðið.

„Bara frábærlega. Þetta eru geggjaðir strákar, þetta eru strákar sem stefna langt í boltanum og eru komnir hérna til að verða betri leikmenn og upplifa bara aðra hluti en þeir voru að gera í Danmörku og held þeir sjái ekkert eftir því. Þeir hafa komið mjög vel inn í þetta og fyrir utan það erum við með miklu meiri breidd núna í liðinu. Getum rúllað miklu meira á liðinu og erum miklu stöðugra lið heldur en í fyrra“, sagði Oddur að lokum.