Jóhanna um lands­liðið: „Auð­vitað er það svekkjandi“

Jóhanna Margrét hefur farið með himinskautum í upphafi leiktíðar í Olís-deildinni og skorað 35 mörk í þremur leikjum, þar af tólf í sigrinum í kvöld.

„Ógeðslega stolt af því hvernig við komum inn í leikinn og spilum í sextíu mínútur. Hörku vörn allan tíman og náðum að keyra vel á þær,“ sagði Jóhanna Margrét beint eftir leik.

Fyrri hálfleikurinn var mjög jafn, en Haukar náðu að mynda sér tveggja marka forystu á lokamínútu fyrri hálfleiks og náðu að búa til góða forystu í þeim síðari sem að lokum skilaði sigrinum. Jóhanna Margrét segir muninn á hálfleikjunum hafa verið færanýtingin.

„Mér finnst við bara ná að klára færin okkar aðeins betur og ná að standa aðeins betur sóknarlega. Vinnum síðan leikinn á varnarleik og stemningu.“

Jóhann Margrét er afar sátt á Ásvöllum.

„Mjög gaman, mér líður ógeðslega vel. Ógeðslega skemmtilegar stelpur, gott þjálfarateymi og mér líður bara mjög vel hérna á Ásvöllum.“

Eins og fyrr segir hefur Jóhanna Margrét farið með himinskautum í upphafi tímabils, en hún var ekki valin í æfingahóp íslenska landsliðið fyrir komandi æfingaviku sem hefst á morgun. Aðspurð hvort það sé svekkjandi, þá stóð ekki á svörum.

„Auðvitað er það svekkjandi. Auðvitað vill maður spila fyrir landsliðið, en maður heldur bara áfram að gera sitt og vonandi skilar það sér,“ sagði Jóhanna Margrét að lokum.