Megum ekki detta niður á þeirra plan

„Það var alls ekki nógu gott. Við vorum bara lélegir og ætlum að hefna fyrir það,“ segir Hákon Arnar eftir æfingu landsliðsins í á Stade de Luxembourgh í dag.

Hann segir að stemningin í hópnum sé góð þrátt fyrir jafnteflið gegn Eistum á laugardag.

„Auðvitað erum við súrir að hafa ekki unnið leikinn en þú veist, það er leikur á morgun og við höfum strax leik til að sýna í hvað okkur býr þannig að það þýðir ekkert að vera súr.“

Hákon segir að liðið megi ekki detta niður á plan andstæðingsins eins og á laugardaginn.

„Við bara duttum niður á þeirra plan og vorum bara ekki góðir, þeir voru bara betri. Við þurfum bara að vera klárir í 90 mínútur allan tímann og vera svona bara aðeins grimmari einhvern veginn.“

Hákon er hrifinn af vellinum hér úti í Lúx.

„Hann er góður og mjög hraður. Mjög flottur völlur og svona gryfja.“

Leikur Lúxemborgar og Íslands er annað kvöld klukkan 18:45. Bein útsending á Sýn Sport hefst klukkan 18.