Gómuð við gróft svindl í Ber­lín

Myndir náðust af Abeeeer þar sem hún fékk sér far með reiðhjóli eftir að hafa hlaupið um 38 kílómetra af maraþoninu, samkvæmt frétt The Independent.

Milltími hennar frá 35.-40. kílómetra í hlaupinu reyndist besti milltími hennar. Sérstök Instagram-síða tveggja ástralskra hlaupara sem vinna að því að góma áhrifavalda fyrir svindl í hlaupum, Official Marathon Time Integrity Unit, sýndi hver raunveruleg ástæða þessa góða millitíma í lokin var.

Abeeeer er með um 530.00 fylgjendur á samfélagsmiðlum og hreykti sér af því eftir hlaupið að hafa náð sínum besta tíma sem þrátt fyrir svindlið var 4:53,46 klukkutímar.

Íþróttavöruframleiðandinn Brooks hafði verið í samstarfi við Abeeeer og útvegað henni hlaupaskó og annan búnað en hefur nú slitið því samstarfi, beðist afsökunar og lofað að skoða betur ferlið á bakvið það hvernig hlauparar eru valdir.

Sjálf hefur Abeeeer einnig beðið fylgjendur sína afsökunar og viðurkennir að eiga sér ekki neinar málsbætur.

„Ég mun ekki reyna að verja þessa hegðun,“ skrifaði Abeeeer sjálf og viðurkenndi að hafa gerst sek um mjög mikinn óheiðarleika. Hún kvaðst hafa fundið fyrir slappleika í hlaupinu en sagði það ekki réttlæta svindlið og bætti við að hún væri með mikið samviskubit yfir því sem hún gerði.