Unnu stór­sigur og komu Ís­landi í umspil

Fyrir leiki kvöldsins þurftu bæði Ísland og Frakkland að vinna til þess að Ísland myndi fara í umspilið og það heppnaðist. Ísland vann Færeyjar 2-0 og með hjálp Frakklands mun liðið fara í umspil fyrir EM sem haldið er á næsta ári.

Sigur Frakklands var nánast aldrei í hættu þar sem liðið var komið í 2-0 forystu eftir fimmtán mínútur með marki frá Mathys Tel og Neo Lebreton. Tel bætti svo við öðru marki og var staðan 3-0 í hálfleik.

Tel fullkomnaði svo þrennuna snemma í seinni hálfleik og náðu Dehmaine Tabibou, Steve Ngoura og Kevin Danois einnig að skora fyrir Frakkland. Liam Chipperfield náði að klóra í bakkann fyrir Sviss en fleiri urðu mörkin ekki.

Svekkjandi úrslit fyrir Sviss sem við Íslendingar tökum fagnandi.