Hannes laus allra mála hjá Qarabag

Landsliðsmarkvörðurinn Hannes Þór Halldórsson hefur fengið samningi sínum við Qarabag rift og er á förum frá félaginu. Þetta kemur fram á heimasíðu Qarabag.

Hannes gekk í raðir Qarabag fyrir tímabilið og skrifaði undir tveggja ára samning við félagið. Hann fékk fá tækifæri með aserska liðinu og lék aðeins átta leiki fyrir það.

Hannes hefur verið sterklega orðaður við Íslandsmeistara Vals sem verða ekki árennilegir takist þeim að krækja í landsliðsmarkvörðinn.

Hannes lék með KR áður en hann fór út í atvinnumennsku 2013. Þar lék hann með Sandnes Ulf og Bödö/Glimt í Noregi, NEC í Hollandi og Randers í Danmörku.