Ekkert af ensku liðunum fer áfram!

Brasilíska knattspyrnuundrið, Ronaldinho hjá Barcelona er ekkert að skafa utan af hlutunum í viðtali við breska blaðið Daily Mirror í dag þar sem hann heldur því fram að ekkert af ensku liðunum fjórum í Meistaradeildinni muni komast í 8 liða úrslitin en 16 liða úrslitunum lýkur á miðvikudag. Barcelona vann Chelsea 2-1 í fyrri leik liðanna fyrir 2 vikum og mætast liðin annað kvöld á Stamford Bridge í London, Ronaldinho sagði að Barcelona færi 100% örugglega áfram í 8 liða úrslitunum og um leið að þrátt fyrir að Liverpool hafi unnið Bayer Leverkusen 3-1 í fyrri leiknum, muni þeim ekki takast að klára dæmið í Þýskalandi á miðvikudag. "Real Madrid, Bayern Munchen, AC Milan og kannski Inter fara áfram. Ég held að ekkert af ensku liðunum komist í 8 liða úrslitin. Eftir að hafa séð Chelsea liðið í návígi er ég 100% viss um að við förum áfram. Við erum með betra lið og munum pottþétt skora gegn þeim nógu mörg mörk sem þarf til að koma okkur áfram." sagði Ronaldinho svellkaldur í bresku pressunni í dag, daginn áður en hann stígur á sviðið á Stamford Bridge. Manchester United tapaði fyrri leiknum gegn AC Milan á heimavelli, 0-1 og Arsenal steinlá fyrir Bayern Munchen á útivelli, 3-1 en Inter Milan gerði 1-1 jafntefli á útivelli við Evrópumeistara Porto. Þá leiðir Real Madrid 1-0 gegn Juventus sem á heimaleikinn annað kvöld.