FH hefur ekki slegið út ÍA í 25 ár

FH hefur ekki náð að slá út ÍA í bikarkeppninni í 25 ár eða síðan að liðið vann 3-1 sigur í leik liðanna í 16 liða úrslitum keppninnar 1980. Skagamenn hafa unnið þrjár síðsutu bikarviðureignir liðanna og í tvö síðustu skiptin hafa þeir unnið bikarmeistaratitilinn (2000 og 2003) eftir að hafa slegið út FH. Síðasti bikarleikur liðanna var einmitt bikarúrslitaleikurinn árið 2003 þar sem Garðar Gunnlaugsson skoraði sigurmark Skagamanna á 80. mínútu. Það voru þeir Pálmi Jónsson, Magnús Teitsson og Helgi Ragnarsson sem skoruðu mörk FH fyrir 25 árum en Jón Gunnlaugsson (faðir Gunnlaugs fyrirliði ÍA) náði að jafna leikinn í 1-1 á 74. mínútu. FH-ingar fóru alla leið í undanúrslitin þetta sumar en duttu þar út í framlengingu fyrir verðandi bikarmeisturum í Fram. FH hefur aðeins unnið 2 af 8 bikarleikjum gegn ÍA hinn sigurinn kom í framlengingu í 8 liða úrslitum keppninnar þremur árum áður. FH-ingar hafa unnið tvo örugga sigra í VISA-bikarkeppninni til þessa , fyrst 5-0 sigur á Víði á útivelli í Garðinum í 32 liða úrsltum og svo 3-1 sigur á KA-mönnum á heimavelli í 16 liða úrslitunum. FH-ingar hafa byrjað báða leikina mjög vel, skoruðu tvö mörk gegn Víði á fyrstu 7 mínútunum og voru komnir í 3-0 eftir hálftíma gegn KA. Tryggvi Guðmundsson er markahæstur hjá FH í VISA-bikarnum með 3 mörk. Skagamenn hafa lent í meiri vandræðum á leið sinni inn í átta liða úrslitin. ÍA vann 3. deildarlið Gróttu 1-2 í 32 liða úrslitunum þar sem Unnar Örn Valgeirsson skoraði sigurmarkið 5 mínútum fyrir leikslok og þruftu síðan framlengingu gegn 1. deildarliði Breiðabliks. Pálmi Haraldsson skoraði sigurmarkið á 101. mínútu eftir að Sigurður Ragnar Eyjólfsson hafði tryggt Skagamönnum framlenginguna með jöfnunarmarki 9 mínútum fyrir leikslok.