Á þriðja þúsund fá ekki háskólavist

Tæplega 2.500 umsóknum um háskólanám hérlendis í haust er hafnað, samkvæmt tölum sem Fréttablaðið hefur tekið saman. Gert er ráð fyrir að heildarfjöldi nýnema í haust verði tæplega 5.700. Þessar tölur eru áætlaðar, þar sem einn og sami einstaklingur kann að sækja um í fleiri en einum háskóla.

Háskóli Íslands heldur ekki skrá yfir þá sem ekki komast að en þar eru reglurnar einfaldar. Allir sem hafa stúdentspróf fá inngöngu eða mega taka tilskilin inntökupróf í deildum á borð við læknadeild.

Ýmsar ástæður eru fyrir því að umsóknum er hafnað. Hluti umsækjenda stenst ekki ýmsar sérkröfur hvers og eins skóla. Hjálmar H. Ragnarsson, rektor Listaháskóla Íslands, segir eðlilegt að fjórir til fimm sitji um hvert sæti í skólanum.

Þyngst mun þó vega að háskólar landsins eru of litlir, enda hefur eftirspurnin aukist ár frá ári. Hlutfallslega vísar Listaháskólinn flestum frá en bæði Háskólinn í Reykjavík og Kennaraháskólinn synja því sem næst annarri hverri umsókn. Ólafur Proppé, rektor Kennaraháskóla Íslands, og Kristín Hulda Sverrisdóttir, staðgengill rektors Háskólans í Reykjavík, segja marga af þeim sem frá verða að hverfa gera gott betur en uppfylla inntökuskilyrði og bekkjardeildir séu einfaldlega fullsetnar. Hyggst Háskólinn í Reykjavík taka Morgunblaðshúsið til notkunar innan tíðar undir kennslu en það dugar skammt og eru langir biðlistar eftir sæti í vinsælustu deildum skólans.