Bifreiðin kastaðist til og frá

Lögreglumál Ökumaður missti stjórn á bifreið sinni á brú við Núpsvötn á Skeiðarársandi um eittleytið í fyrrinótt. Bifreiðin kastaðist til og frá á brúnni og skall í vegrið. Mikil mildi þykir að sögn lögreglu að bifreiðin hafi haldist inn á brúnni.

Bifreiðin fór veltu nánast um leið og hún kom af brúnni og endaði utan vegar á hliðinni. Ökumaðurinn var í bílbelti og slapp án meiðsla en fann ekki farsíma sinn til að gera lögreglu viðvart, enda myrkur og rigning á svæðinu þegar slysið varð.

Vegfarandi sem kom að slysstaðnum tæpum hálftíma síðar fann ökumanninn blautan og skelkaðan. Hringdi hann í Neyðarlínuna, sem gerði lögreglunni í Vík viðvart.