Gætu þurft að skýra betur verðbreytingar

Ferðaskrifstofur gætu þurft að gera skýrar grein fyrir verðbreytingum sínum á næstunni eftir að Neytendastofa komst að því að hækkun fyrr á árinu vegna gengisbreytinga væri ólögmæt. Neytendasamtökin ráðleggja fólki sem hyggst skipta niður greiðslum vegna pakkaferða að gera það með fyrirvara þar til úrskurður áfrýjunarnefndar neytendamála liggur fyrir.

Helstu ferðaskrifstofur landsins hækkuðu í vor verð á sumarferðum sínum og báru því við að gengi krónunnar hefði lækkað töluvert. Vísuðu þær þar til almennra ferðaskilmála hjá Samtökum aðila í ferðaþjónustu. Hækkanirnar náðu meðal annars til ferða sem gengið var frá síðastliðinn vetur en voru ekki að fullu greiddar.

Við þetta sætti einn af viðskiptavinum Heimsferða sig ekki við og kvartaði til Neytendastofu. Hún komst að þeirri niðurstöðu að Heimsferðir hefðu ekki farið að lögum um alferðir, eða pakkaferðir, þar sem ferðaskrifstofan hefði ekki tilgreint nákvæmlega í bæklingum eða með reikningi hvaða áhrif gengisbreytingar gætu haft á verð pakkaferða. Þeim úrskurði hefur verið áfrýjað til áfrýjunarnefndar neytendamála.

Fjölmargir hafa haft samband við Neytendasamtökin í sumar vegna verðbreytinganna. Hildigunnur Hafsteinsdóttir, starfsmaður Neytendasamtakanna, segir úrskurðinn í raun aðeins ná til þess sem kvartaði en bíða verði endanlegs úrskurðar til að kanna hvort einhverjir eigi rétt á endurgreiðslu vegna verðhækkananna.

Hildigunnur segir samtökin ráðleggja fólki hér eftir að greiða með fyrirvara um réttmæti hækkunar vegna gengisbreytinga úr því að Neytendastofa hafi fellt þennan úrskurð. Það sé þó ekki þar með sagt að það fái endurgreiðslu. Það auðveldi hins vegar endurgreiðslur ef greitt sé með fyrirvara. Það geri fólk með því að skrifa t.d. á samning: „Greitt með fyrirvara um réttmæti kröfu." og það verði að gæta þess að halda eftir afriti af honum.