Dýrasta mynd Íslandssögunnar frumsýnd í gærkvöld

Dýrasta kvikmynd Íslandssögunnar, Bjólfskviða í leikstjórn Sturlu Gunnarssonar, var frumsýnd í gærkvöldi. Kostnaður við myndina var einn milljarður króna.

Kvikmyndin Bjólfskviða var að mestu leyti tekin upp hér á landi og eru Íslendingar í helstu lykilstöðum við myndina. Meðframleiðendur eru Friðrik Þór Friðriksson og Anna María Karlsdóttir en Ingvar Sigurðsson leikur eitt aðalhlutverkanna.

Myndin er byggð á sögu frá árinu 800 og gerist í Danmörku. Tröll, forynjur og víkingar koma við sögu enda þykir myndin líkjast Hringadrottinssögu. Landslagið við Mýrdal er fyrirferðarmikið í myndinni enda var mestur hlutinn tekinn upp þar.

Friðrik Þór sagði í samtali við NFS í dag, binda miklar vonir við Bjólfskviðu en kvikmyndin er í sýningum í Bandaríkjunum, Kanada og víða í Evrópu um þessar mundir. Leikarinn Gerald Butler leikur aðalhlutverkið en hann var staddur á frumsýninguni í gærkvöld.