Logaði í rúmfötum

Slökkviliðið á höfuðborgarsvæðinu sendi fjölmennt lið af stað eftir að tilkynning barst um mikinn reyk frá húsi við Njálsgötu á fjórða tímanum í nótt. Þegar það kom á vettvang rauk úr brennandi rúmfötum fyrir utan húsið.

Við nánari athugun kom í ljós að íbúinn hafði kastað þeim út, þegar eldur varð laus í þeim. Að því búnu hélt hann aftur inn í reykjarkófið í húsinu og lagðist til svefns. Hann var fluttur á Slysadeild vegna gruns um reykeitrun og slökkviliðið reykræsti húsið.