Lykilorð bloggara birt á síðum þeirra

Lykilorð sumra bloggara á mbl.is voru birt í skamma stund á bloggsíðum þeirra nú í morgun. Um mikil mistök er að ræða því þeir sem sáu lykilorðin hefðu getað skrifað þau niður, farið inn á bloggsíðu viðkomandi og breytt henni.

Starfsmaður mbl bloggsins sagði í samtali við Vísi að lykilorðin hefðu birst á meðan verið var að uppfæra hugbúnað á netþjónum bloggþjónustunnar. Lykilorðið var að finna neðst á síðum notenda. Hann sagði einnig að þetta hefði ekki komið fyrir hjá öllum notendum og að þeim notendum sem þetta kom fyrir hjá hefði verið bent á að breyta lykilorði sínu hið fyrsta.

Steingrími Sævarr Ólafssyni, bloggara á mbl.is, var bent á þetta af tveimur lesendum sínum í morgun. Í framhaldi af því skrifaði hann um atvikið á bloggsíðuna sína, sem má finna hér.