Okkur verður að langa þetta aðeins meira

Friðrik Ragnarsson þjálfari Grindavíkur vildi meina að sína menn hefði skort örlitla heppni í kvöld þegar þeir lágu fyrir Njarðvík í Ljónagryfjunni. Hann segir lið sitt staðráðið í að vinna næsta leik í Grindavík.

"Þessi leikur spilaðist nokkurn veginn eins og við gerðum ráð fyrir. Við vissum að þetta yrði jafnt í lokin og okkur vantaði bara smá heppni. Þegar hingað er komið við sögu er þetta spurning um frákast, lausan bolta eða eitt skot til að klára þetta.

Það hefur sýnt sig í leikjum þessara liða að 10 stiga munur er ekki mikill og því er aldrei neitt gefið fyrr en búið er að flauta af. Okkur verður bara að langa þetta aðeins meira og það er engin spurning að við tökum næsta leik," sagði Friðrik í samtali við Sýn eftir leikinn.