Búið að skipa svokallaða Breiðavíkurnefnd

Forsætisráðherra hefur skipað nefnd sem ætlað er að kanna starfsemi vist- og meðferðarheimila fyrir börn. Í fyrstu er nefndinni ætlað að kanna starfsemi Breiðavíkur á árunum 1950 til 1980. Meðal þess sem nefndinni er ætlað að skoða er í hvaða mæli börnin, sem vistuð voru á Breiðavík, hafi sætt illri meðferð eða ofbeldi á meðan á dvölinni stóð og leggja fram tillögur til stjórnvalda um frekari viðbrögð. Nefndin hefur til fyrsta janúar, á næsta ári, til að skila inn skýrslu til forsætisráðherra.

Nefndina skipa Róbert R. Spanó, prófessor í lögfræði sem er formaður,dr. Sigrún Júlíusdóttir, prófessor í félagsráðgjöf, dr. Jón Friðrik Sigurðsson, yfirsálfræðingur og dr. Ragnhildur Bjarnadóttir, dósent í sálfræði. Ritari nefndarinnar er Aagot V. Óskarsdóttir, sérfræðingur hjá Lagastofnun HÍ.

Samkvæmt erindisbréfi forsætisráðherra er nefndinni í fyrstu ætlað að kanna starfsemi vistheimilisins Breiðavíkur á árunum 1950 til 1980. Markmið þeirrar könnunar og meginverkefni nefndarinnar vera eftir­farandi:

a. Að lýsa starfsemi vistheimilisins Breiðavíkur, hlutverki hennar í barnaverndar- eða uppeldismálum og tildrögum þess að börn voru vistuð þar á ofangreindu tímabili.

b. Að leitast við að staðreyna eins og kostur er hvort og þá í hvaða mæli börn sem vistuð voru á vistheimilinu Breiðavík hafi sætt illri meðferð eða ofbeldi meðan á dvölinni stóð.

c. Að lýsa því hvernig opinberu eftirliti með vistheimilinu Breiðavík var háttað.

d. Að leggja grundvöll að tillögum til stjórnvalda um frekari viðbrögð ef ástæða þykir til.