Léleg laxveiði á Vesturlandi

Léleg laxveiði hefur verið í flestum ám á Vesturlandi og reyndar víða um land upp á síðkastið, enda óvenju lítið vatn í ánum vegna þurrka. Í Norðurá hafa til dæmis ekki veiðst nema 60 laxar frá opnun, fyrir 20 dögum síðan.

Þar er veitt á tólf stangir í senn og hefur meðalveiðin verið um þrír laxar á dag. Þetta er mun minna en í fyrra. Að sögn veiðimanna má að öllum líkindum rekja þetta til vatnsleysis og svo er svonefndur Jónsmessustraumur ekki fyrr en um mánaðamótin, en með honum berst jafnan mikið af laxi upp í árnar á Vesturlandi.