Walker: Spilum með hjartanu

BA Walker sagði eftir sigur sinna manna í Keflavík á Snæfelli í dag að þeir þyrftu að spila með hjartanu til að vinna Íslandsmeistaratitilinn.

„Við erum með lágvaxið lið og þeir eru stærri og sterkari en við. Við þurfum því að spila með hjartanu," sagði Walker í samtali við Svala Björgvinsson á Stöð 2 Sporti eftir leikinn.

„Við tökum varla fleiri fráköst en þeir en við verðum að reyna að halda í við þá. Í dag náðum við ekki að spila neitt sérstaklega góða vörn en við hittum vel. Snæfell er með sterkt lið en við náðum að setja niður mikilvægar körfur þegar við þurftum virklega á því að halda."

Spurður hvort Keflvíkingar væru þreyttir eftir langa og stranga rimmu við ÍR í undanúrslitum sagði Walker að þeir hefðu hreinlega ekki efni á því að vera þreyttir.

„Við getum leyft okkur að vera þreyttir eftir tímabilið."