Hætta flugi milli Akureyrar og London vegna eldgossins

Iceland Express hefur ákveðið að hætta við reglubundið flug milli Akureyrar og London, sem vera átti í sumar, þar til næsta ár. Ástæða þess er sú, að dregið hefur úr eftirspurn eftir ferðum, bæði hér heima og í öðrum löndum vegna eldgossins í Eyjafjallajökli.

„Þetta er ekki skemmtilegt í ljósi þess, að fyrir gos voru bókanir sem aldrei fyrr og það leit út fyrir besta ferðasumar í sögu lýðveldisins og að fjöldi ferðamanna myndi slá öll met. Ferðaþjónustan hefur verið sú atvinnugrein sem hefur spjarað sig hvað best í umrótinu undanfarin misseri," er haft eftir Matthíasi Imsland, forstjóra Iceland Express, í tilkynningu.

Matthías segir ljóst að sumarið í sumar verði ekki sú lyftistöng fyrir þjóðfélagið sem vonast var eftir. Iceland Express hafi því ákveðið að draga úr framboðinu í sumar. „Ég hef hins vegar fulla trú á, að gosið mun hafa mikil og góð áhrif til framtíðar fyrir ferðaþjónustuna og okkur öll," segir Matthías.

Fjárhagslegt tjón Iceland Express vegna gossins er mun minna en áður var talið, að því er segir í tilkynningunni.