Reyndi fjársvik í Landsbankanum, dæmdur í fangelsi

Breski viðskiptamaðurinn og fjársvikarinn Peter Guestyn var dæmdur í tveggja og hálfs árs fangelsi í dag fyrir dómi í London. Meðal ákæruliða gegn honum var tilraun til að svíkja 70 milljónir dollara, eða rúmlega 9 milljarða kr. í Landsbankanum árið 2005.

Guestyn hafði reynt svipuð fjársvik árið 2002 í breskum banka en þau fólust í því að hann kvaðst hafa undir höndum svokallaða silfurseðla í dollurum (silver certificates) sem Bandaríkjastjórn gaf út á fyrrihluta síðustu aldar og vildi selja þá eða nota sem veð fyrir láni.

Í frétt um málið í Daily Mail segir að Guestyn hafi haft samband við bankastjóra Landsbankans með tölvupósti þar sem hann lýsti áhuga sínum á að leggja 70 milljónir dollara inn á reikning í bankanum. Í tölvupóstinum segir hann að þetta væri einka- og trúnaðarmál. Féið hefði hann fengið frá fjármálaráðuneyti Bandaríkjanna og að FBI hefði staðfest yfirfærslu á því. Jafnframt sendi hann mynd af silfurseðli.

Breska lögreglan upplýsti starfsmenn Landsbankans, sem fóru frá Reykjavík til London til að hitta Guestyn, að seðlarnir væru falskir og að starfsmennirnir ættu að hafa varan á sér. Á fundinum gat Gyestyn ekki gert frekari grein fyrir seðlunum að öðru leyti að um leynileg viðskipti hafi verið að ræða bæði í Bandaríkjunum og í Kína.

Á næstu dögum reyndi Guestyn að fá lán frá Landsbankanum upp á fyrrgreinda upphæð með seðlana sem veð. Íslensk yfirvöld kærðu manninn og hann var handtekinn á heimili sínu í East Sussex.

Guestyn var síðan látinn laus gegn tryggingu meðan á dómsmeðferð stóð. Hann reyndi svo sama leikinn í fyrra við banka í The City og þá var upphæðin sem hann reyndi að svíkja út komin upp í tæpan milljarð dollara. Þá var hann handtekinn á ný og hefur nú verið dæmdur.

Það athyglisverða við málið er að Guestyn sagði að hver seðill sem hann hefði undir höndum væri milljón dollara virði. Hinsvegar voru engin slíkir seðlar gefnir út og hámarksupphæð á þeim var 1.000 dollarar. Þar að auki hætti Bandaríkjastjórn að gefa þessa seðla út árið 1969.