Icelandair hefur fellt niður allt flug síðdegis í dag vegna lokunar Keflavíkurflugvallar, en ekkert var flogið í morgun vegna þess að vellinum var lokað í nótt. Ekkert innanlandsflug er heldur um Reykjavíkurflugvöll og tólf farþegaþotur eru innilokaðar á Keflavíkurflugvelli.
Fleiri hundruð manns urðu strandaglópar á Keflavíkurflugvelli eftir að vellinum var óvænt lokað í nótt vegna öskufalls frá Eyjafjallajökli. Reykjavíkurflugvelli var lokað um leið. Brottför sjö véla Icelandair til Evrópu hafði verið flýtt til klukkan fimm í nótt, en völlurinn lokaðist fyrir þann tíma. Vélarnar eru því fastar á vellinum ásamt fimm öðrum vélum frá Icelandair og Iceland Express.
Þrjár vélar frá Bandaríkjunum lentu á Akureyri undir morgun og fóru farþegar úr þeim í rútubílum til Reykjavíkur. Vélarnar eru þar enn og verður flogið tómum til Keflavíkur um leið og völlurinn verður opnaður á ný. Icelandair gerir ráð fyrir að allt flug féllagsins verði samkvæmt áætlun á morgun og verða farin aukaflug til nokkurra áfangastaða.
Tólf þotur fastar á Keflavíkurflugvelli
