Einn efnilegasti leikmaður NFL gripinn rallölvaður á bíl

Útherjinn Justin Blackmon hjá Jacksonville, sem var valinn fimmti í nýliðavali NFL-deildarinnar, byrjar NFL-ferilinn ekki vel því hann var handtekinn fyrir ölvun við akstur.

Blackmon var stöðvaður klukkan þrjú um nótt. Hann blés fyrir lögregluna og áfengismagnið í honum var þrisvar sinnum meira en leyfilegt er. Með öðrum orðum þá var hann á herðinni eins og margir kalla það.

Hann mun því missa bílprófið og á von á hárri sekt. Félag hans er einnig líklegt til þess að refsa honum fyrir atvikið.

"Það sást til hans á bensínstöð þar sem hann átti erfitt með að ganga eðlilega og einnig var erfitt að skilja hann," sagði lögreglan sem fékk ábendingu um Blackmon og stöðvaði hann í kjölfarið.