Helga Margrét reynir við Ólympíulágmarkið um helgina

Sjö íslenskir frjálsíþróttamenn verða meðal þátttakenda á Norðurlandamóti unglinga í fjölþrautum í Sandnes í Noregi um helgina. Þeirra á meðal er Helga Margrét Þorsteinsdóttir sem stefnir á að ná Ólympíulágmarki í sjöþraut.

Helga Margrét á best 5.878 stig frá því árið 2009. Lágmarkið inn á leikana er 5.950 stig en síðasti dagur til að ná lágmörkum fyrir leikana er 8. júlí. Ólympíuleikarnir hefjast þann 27. júlí.

Auk Helgu Margrétar verða Arna Stefanía Guðmundsdóttir ÍR, Ásgerður Jana Ágústsdóttir UFA, Ingi Rúnar Kristinsson Breiðabliki, María Rún Gunnlaugsdóttir Ármanni, Sindri Hrafn Guðmundsson Breiðabliki og Sveinbjörg Zophoníasdóttir úr FH meðal keppenda.

Arna Stefanía, Ingi Rúnar og María Rún stefna á að ná lágmarki fyrir heimsmeistaramót 19 ára og yngri sem fram fer í Barcelona um miðjan júlí. Síðasti dagur til að ná lágmörkum fyrir mótið er 2. júlí.