Mamman vill ráða hvar sonurinn spilar háskólabolta

Það getur verið erfitt að vera ungur afreksíþróttamaður í Bandaríkjunum. Sérstaklegar þegar fjölskyldan vill fara að taka ákvarðanir fyrir íþróttamanninn.

Í gær skrifuðu efnilegustu framhaldsskólanemarnir í amerískum fótbolta undir hjá háskólum. Allt gekk það snuðrulaust hjá öllum nema hlauparanum efnilega, Alex Collins.

Hann hafði ákveðið að fara í Arkansas-háskólann en verður að bíða aðeins því móðir hans neitaði að skrifa undir pappírana.

Hún vill að hann spili með Miami-háskóla þar sem sá skóli sé nær heimilinu. Aðrir fjölskyldumeðlimir styðja þá ákvörðun.

"Ég vil sjá hann fara í Miami því skólinn hentar honum betur að mínu viti. Svo kemst hann fljótar heim og mamma getur keyrt á leiki í stað þess að þurfa að fljúga til Arkansas," sagði Johnny bróðir Alex.